Veturin kom við kulda og … regni. Jú, onkuntíð kavar um veturin, men oftast er meira regn enn kavi. Tað ber sjálvandi til at balla seg undir dýnuna við eini góðari bók og hoyra regnið vaska vindeyguni rein. Men tá ið tú ert liðug at lesa bókina, ella tá ið tað regnar fyri 6. ferð hesa vikuna, so fært tú kanska hug at fara út
Her eru nøkur hugskot til, hvat man kann gera úti, tá ið tað regnar
1. Tvassa í hyljum
Lat teg í gummistivlarnar og fær út og hoppa í tann størsta og vátasta hylin, tú finnur. Tú minnist kanska, hvussu stuttligt tað plagdi at vera, tá ið tú gekst í barnagarði og veist tú hvat? Tað er líka stuttligt enn! :)
2. Fá gras undir iljarnar og runu millum tærnar
Eigur tú ongar gummistivlar? Eingin trupulleiki! Tú kanst fara út at spæla allíkavæl. Lat teg úr sokkunum og brett buksubrøkurnar upp. Gakk í váta grasinum og lat tað massera tær um iljarnar. Finn síðani eitt lítið runudíki og statt og skvampa í tí eina løtu. At fáa runu millum tærnar fær teg eisini at smílast :)
Mynd: Bjalla B. Dalsgarð
3. Runulist
Nú tú stendur í runudíkinum, kanst tú royna at taka tær ein klump upp í hondina. Forma klumpin til eina lekra runukøku. Hetta er bara byrjanin. Nú kanst tú royna at forma rununa til alt møguligt seyðir, pappageykar, eina runuborg ella kanska ein heilan runu(kava)mann!
Er eitt runublak sum eitt kavablak? Mynd: Bjalla B. Dalsgarð
4. Runukríggj
Málið tykkum nakrar krígsstrípur á kjálkar og pannu við runu. Nú eru tit klár at fara í kríggj. Runukríggj er eitt sindur sum kavakríggj – man brúkar bara runubløk í staðin fyri kavabløk.
5. Ger tín egna sangleik
Um tær kki dámar runu og heldur ikki tímir nakað serliga væl at tvassa í hyljum, so er ein sangleikur kanska nakað fyri teg. Í nógvum sangleikum er ein sena, har ein (ella fleiri) av høvuðsleikarunum syngja og dansa úti í regni – og tað sær vakurt út á filmi. Tú kanst eisini lata teg í stuttlig klæðir – tá verður tað eyka sangleikasligt!
Finn tær filmstólið fram (t.d. eina telefon, sum kann taka video), koyr tónleik í oyruni og syng og dansa úti í regninum. Heimkomin kanst tú leggja ljóð og effektir á.
Minst bara til, at tann, ið filmar, má standa undir einum regnskjóli, tí flestu myndatól tola ikki regn!
Kennir tú filmin “Singing in the Rain”? Har eru nógvir góðir sangir í. Mynd: Tjóðhild Patursson
6. Regnbað
Og síðst, men ikki minst: Far í regnbað! Regnar tað ordiliga illa, kanst tú fáa tær sápu við út og vaska tær úti í regninum. Tað verður besta og stuttligasta bað, tú nakrantíð hevur upplivað.
Dámar tær regnbað? Mynd: Savnsmynd
Grein í Píka7 2 2022
Hugskot og tekstur: Tjóðhild Patursson