Vit kunnu bólka fiskar í tveir bólkar: beinfiskar og bróskfiskar.
Beinagrindin í fiskaunga er úr bróski. So hvørt sum ungin veksur, legst kálk í bróskið, sum harðnar og verður til bein.
Trý fiskasløg hava tó beinagrind úr bróski alt lívið; tey eru: hávur, havmús og skøta.
Heiti á fiski. Tekning: Astrid Andreasen.
Vøddar
Vøddarnir eru festir í beinagrindina. Teir eru tað av fiskinum, sum vit eta.
Fiskur hevur vanliga ljósar vøddar, tí lítið blóð er í teimum.
Fiskar, sum svimja skjótt og leingi, hava meira blóð í sær og hava tí reydligar vøddar, t.d. tunfiskur og makrelur.
Sjósíl og laksur hava eisini reyðar vøddar. Tann reyði liturin kemur í hesum føri ikki av blóði, men av einum reyðum evni í krabbadýrunum, ið fiskarnir eta.
Sjósíl, sum sæst fremst á myndini, hevur reyðar vøddar. Tann reyði liturin kemur av einum reyðum evni í krabbadýrunum, ið fiskarnir eta. Hitt fiskaslagið á myndini er multa. Mynd: Hans Eli Sivertsen, Føroya Sjósavn.
Skræða
Húðin á fiski eitur skræða. Í skræðuni eru kyknur, sum gera slím. Slímið ger skræðuna hála, so fiskur glíður betur gjøgnum sjógvin. Slímið verjir eisini fiskin móti lúsum og øðrum sníkum.
Í summum kyknum í skræðuni eru tinnur. Tá ið ljósið skínur á tinnurnar, glógva tær grønar og blankar. Tað eru serliga fiskar uppi í sjónum, t.d. sild, síl og multa, sum hava tinnur í skræðuni.
Tinnurnar í skræðuni á makreli glógva grønar og blankar, tá ið ljósið skínur á tær. Mynd: Hans Eli Sivertsen, Føroya Sjósavn.
Skifta lit
Litkyknurnar í skræðuni hava antin svart, reytt, gult ella blátt evni í sær. Summir fiskar skifta lit.
Fer toskur t.d. inn í taran, verður hann reyður (reyðfiskur) og er soleiðis betur vardur fyri fíggindum. Tað er litevni í kyknunum, sum tekur seg saman ella breiðist út. Tekur t.d. svarta litevnið seg saman í teimum svørtu litkyknunum, verður fiskurin ljósur.
Nógvir fiskar verða eisini litfagrir í gýtingartíðini.
Fer toskur inn í taran, verður hann reyður (reyðfiskur) og er soleiðis betur vardur fyri fíggindum. Mynd: Hans Eli Sivertsen, Føroya Sjósavn.
Roðsla
Í skræðuni eru eisini tunnar beinflísar ella roðsla. Tó hava ikki allir fiskar roðslu.
Í roðsluni eru árringar. Leggur tú roðslu undir sjóneyku, kanst tú telja árringarnar og síggja, hvussu gamal fiskurin er.
Í skræðuni á hesum fiskinum eru bæði tinnur og roðsla. Mynd: Hans Eli Sivertsen, Føroya Sjósavn.