Í Føroyum eru nógv, sum duga væl at dansa hipp hopp. Hon, sum dugir best, eitur Diana, og hon hevur lært føroysk børn og ung at dansa hipp hopp í fleiri ár. Eg havi spurt Dianu um dans og hipp hopp og eisini tosað við Esra, sum gongur til hipp hopp hjá Dianu eins og eg
- Míni ítriv eru hipp hopp, hondbóltur og at spæla við mín besta vin Ludvík. Vit hava tað altíð so stuttligt, sigur MIA RÓGVADÓTTIR Í STÓRUSTOVU, sum er 7 ár og gongur í 1. fl. í Skúlanum á Argjahamri
MEN HVAT ER SO GOTT VIÐ AT DANSA HIPP HOPP?
Mia: – Tað er ordiliga stuttligt. Vit læra nógvar nýggjar rørslur hvørja ferð, hipp hopp-triks, hoyra kulan tónleik, sum vit kenna aftur frá spølum og øðrum á netinum. Vit spæla dansispøl, vit flenna og hugna okkum og fáa nýggjar vinir. Og so røra vit okkum og dansa, til vit eru um at bresta í hita. Tað er ordiliga gott at røra seg, og dansur krevur góða konditión.
DIANA SVARAR
HVUSSU BYRJAÐI TÚ AT DANSA?
– Eg fór at dansa, tá ið eg var 14 ára gomul. Tvær aðrar gentur og eg stovnaðu okkara egna dansibólk á Toftum og fóru at framføra til nøkur tiltøk runt í Føroyum. Eg fór við bussinum til Havnar 2-3 ferðir um vikuna fyri at kunna taka dansitímar.
DANSAÐI TÚ, TÁ TÚ VART 7 ÁR?
– Eg minnist ikki, um eg dugdi at dansa, tá ið eg var 7 ár. Eg minnist, at eg altíð havi funnið upp á seriur og dansað saman við vinkonunum. Men eg byrjaði tíanverri ikki at ganga til dans, fyrr enn eg var 14 ár.
– Eg havi altíð tímað best at dansa allar dansirnar innan hipp hopp, men eg gekk eisini til djass og ballet. Har eru heilt ótrúliga nógv sløg av dansi til, men mín yndisdansur er waacking, hipp hopp og house.
NÆR VISTI TÚ, AT TÚ VILDI LIVA AV AT DANSA?
- Hetta er Diana. Hon líkasum eigur alt hetta. Hon bestemmar og er „dancing queen“. Aftrat sær hevur hon Rannvá, sum eisini er venjari hjá okkum
– Eg haldi, at longu tá eg tók mín fyrsta dansitíma sum 14 ára gomul, visti eg, at eg vildi liva av at dansa. Tá eg var 17 ár, flutti eg einsamøll til Keypmannahavnar at taka mína fyrstu dansiútbúgving. Eg flutti heim aftur til Føroyar í 2017, og tá spurdi stjórin í Føroya Fólkaháskúla meg, um eg ikki kundi undirvísa í dansi. Eg segði ja, og nú havi eg undirvíst har í 4 ár.
HVUSSU NÓGVAR NÆMINGAR HEVUR TÚ?
–Tá eg byrjaði at undirvísa í Føroyum, hevði eg umleið 10 næmingar tilsamans. Nú eru tað umleið 30 á hvørjum liði. So áhugin er heilt vist vaksin nógv.
HEVUR TÚ FÓLK AT HJÁLPA TÆR?
– Rannvá Klettheyggj hevur hjálpt mær við øllum mínum liðum síðan 2017 og ger tað enn. Men skjótt rýmir hon frá okkum, hon fer nú eisini at útbúgva seg í dansi. So havi eg eisini eina fitta, unga damu aftrat, sum eitur Bjørt Nørspang Davidsen.
HVAT ER TÍTT STØRSTA YNSKI FYRI DANS Í FØROYUM?
– Mítt størsta ynski og mál fyri dans í Føroyum er, at allir skúlar hava meira dansiundirvísing í ítrótti. Og at fleiri næmingar leggjast aftrat, og at allir okkara dugnaligu, útlærdu dansarar kunnu koma heim til Føroyar at arbeiða við øllum sløgum av dansi.
- Frítíðarítrivini hjá mær eru hondbóltur, hipp hopp, at skateboarda og beatboxa. Mær dámar eisini væl at spæla við vinir og playstation, sigur ESRA Í DALI HÁBERG, sum er 7 ár og gongur í 1. b í Skúlanum á Fløtum
ESRA SVARAR
HVUSSU DÁMAR TÆR AT GANGA TIL HIPP HOPP?
– Ordiliga væl. Tað er so stuttligt og gott! Mamma spurdi, um eg vildi ganga til hipp hopp, tí hon sá, at mær dámdi væl at dansa Just Dance. Eg havi dansað hipp hopp í eitt og eitt hálvt ár.
HVAT GERA TIT, TÁ IÐ TIT ERU TIL HIPP HOPP?
– Vit dansa og læra kul triks. Vit gera eisini hipp hopp-sýningar, sum vit vísa fram fyri fólkum.
HVAT HEVUR TÚ LÆRT?
– Eg havi lært at dansa hipp hopp og at break-dansa betur.
ERU AÐRIR DREINGIR, SUM TÚ HELDUR DUGA VÆL AT DANSA HIPP HOPP?
– Ja, eg havi sæð nógvar dreingir, sum duga ordiliga væl at dansa hipp hopp og break-dans á YouTube. Eg havi eisini lært nógv hipp hopp-trin og triks frá Fortnite og Just Dance-spølunum.
HVUSSU ER AT DANSA SAMAN VIÐ ØÐRUM BØRNUM?
– Tað er so stuttligt. Eg havi fingið fleiri vinir.
FERT TÚ AT GANGA TIL HIPP HOPP Í NÓGV ÁR AFTRAT?
– Ja. Eg havi akkurát meldað meg til at dansa á einum nýgg jum hipp hopp-liði, sum er eitt dreing jalið. Tað gleði eg meg til.
– Til hipp hopp læra vit at dansa og at gera kul triks. Vit gera eisini hipp hopp-sýningar, sum vit vísa fram fyri fólkum
Grein í Píka7 2 2022
Tekstur: Mia Rógvadóttir í Stórustovu og Elin í Stórustovu
Myndir: Elin í Stórustovu og Ólavur Jóannesarson Hansen