Í taraskóginum — Píkasjey

Tari er planta, sum veksur í sjógvi. Eins og aðrar plantur má tari fáa ljós, skal hann vaksa.

Ljósið skínur ikki meira enn umleið 40 metrar niður í sjógvin. Djúpari niðri í sjónum er myrkt. Tí er eingin taravøkstur djúpari enn 40 metrar.

Tari veksur best um summarið, tí tá er ljósast.

Ymiskan lit

Tari kann vera reyður, brúnur ella grønur á liti. Í stuttum kann sigast, at reyðtari veksur djúpast, brúntari í miðjuni og ovast veksur grøntari.

Tarasløgini eru ymisk í stødd. Onkur tari sæst ikki við berum eygum, annar er bara nakrar sentimetrar, og upp aftur annar 45 metrar langur.

Ein trøllahummari í taraskóginum. Her sæst bæði grønur, brúnur og reyður tari. Mynd: Hans Eli Sivertsen, Føroya Sjósavn

Taraskógur

Øki, har nógvur tari veksur, nevna vit taraskóg. Í taraskóginum svimja nógv ymisk sløg av smáfiski og yngli. Á tarabløðunum sita gággur og aðrar smáar verur og eta burtur av taranum.

Felags fyri flestu fiskasløgini í taraskóginum er, at tey eru smá, og at tey verja avkomið hjá sær.

Á botninum millum taran ganga krabbar runt millum skeljar, krossfiskar, slangustjørnur og igulker.

Ungarnir hjá rognkelsi halda til inni í taranum, ofta á heilt grunnum sjógvi. Tá ið ungarnir eru 5 cm langir, líkjast teir vaksna rognkelsinum og fara tá út á djúpari sjógv. Mynd: Hans Eli Sivertsen, Føroya Sjósavn.

Tari er góður matur

Fyrr í tíðini varð tari nýttur til matna, tá ið svangligt var. Í tara eru eisini nógv C-vitamin, og tí bleiv tari brúktur til fólk við skyrbjóg. Skyrbjóg er ein sjúka, sum fólk fáa, tá ið tey mangla C-vitamin. Nú á døgum fært tú tara at eta, um tú til dømis etur sushi.

Seyður, sum gongur í fjøruni, etur eisini tara.